Bugun korxonaning faollar zalida O‘zbekiston Respublikasi Mustaqilligining 34 yilligiga bag‘ishlangan tantanali tadbir bo‘lib o‘tdi.

Joriy yilda Mustaqillik kuni “Vatan uchun, millat uchun, xalq uchun!” degan ezgu g‘oya ostida nishonlanmoqda.

Tadbir O‘zbekiston Respublikasi Davlat madhiyasining sadolari bilan boshlandi, Davlat madhiyasi barcha tadbir ishtirokchilarda ko‘tarinki ruh va bayramona kayfiyat uyg‘otdi.

So‘zga chiqqan Jamiyat boshqaruv raisi Dilshod Mannonov o‘z nutqida xodimlarni samimiy tabriklab, Mustaqillik bayramining har bir fuqaro uchun qadrli ekanini ta’kidladi hamda korxona jamoasining fidokorona mehnati uchun minnatdorlik bildirdi.

Bayramona kayfiyatni O‘zbekiston Davlat filarmoniyasi Farg‘ona hududiy bo‘limi ijodkorlari taqdim etgan konsert dasturi yanada boyitdi. Vatan va xalqni madh etuvchi qo‘shiqlar, raqslar hamda yurtimizning go‘zalligini tarannum etuvchi chiqishlar barchaning qalbini g‘urur va iftixorga to‘ldirdi. Filarmoniya xonandalari ijrosidagi xorijiy estrada qo‘shiqlari esa bayramona shukuhni yanada oshirdi, bayramda ishtirokchilar esa yangrayotgan qo‘shiqlarga jo‘r bo‘lib raqsga tushishdi.

Bayram tadbirining eng ta’sirchan lahzalaridan biri — AK-72 sexi xodimi Bahromjon Mashrapovning mustaqillikka erishgan o‘zbek xalqining tarixiy taqdiri haqida yod etgan samimiy she’rlari bo‘ldi.

Tadbir yakunida korxonaning bir guruh ilg‘or xodimlari ko‘p yillik halol va samarali mehnati, ishlab chiqarishda erishilgan yuqori ko‘rsatkichlari, jamoat hayotidagi faolligi uchun faxriy diplom va pul mukofotlari bilan taqdirlandilar. Shuningdek, bayram arafasida “Yangi O‘zbekiston bilimdonlari” shiori ostida o‘tkazilgan intellektual tanlov g‘oliblari ham diplomlar bilan mukofotlandi.

 “Farg‘onaazot” AJ jamoasi barcha yurtdoshlarimizni Davlat Mustaqilligining 34 yilligi bilan chin dildan muborakbod etadi! Barchaga sihat-salomatlik, baxt-saodat, farovonlik va yangi mehnat yutuqlarini tilab qoladi!

«Farg‘onaazot» AJ matbuot xizmati